Donald Trump Bandaríkjaforseti segir að ásakanir um kynferðislega áreitni á hendur Brett Kavanaugh, dómaraefnis hans, séu einungis pólitískar. Önnur kona steig fram í dag og ásakaði Kavanaugh um kynferðislega áreitni. BBC greinir frá.
Trump ávarpaði allsherjarþing Sameinuðu þjóðanna í New York í dag og sagði meðal annars að hann styddi Kavanaugh alla leið.
Christina Blasey Ford steig fram undir nafni í síðustu viku og ásakaði Kavanaugh um að hafa beitt hana kynferðislegu ofbeldi þegar þau voru í framhaldsskóla. Í dag steig Deborah Ramirez fram og sagði að Kavanaugh hefði berað kynfæri sín í háskólapartíi og neytt hana til að snerta þau.
Kavanaugh hefur neitað báðum ásökununum og sagði Trump í ávarpi sínu í dag að ásakanirnar væru þær ósanngjörnustu sem nokkurn tíma hefðu komið fram gegn frambjóðanda fyrir nokkurn skapaðan hlut.