Sviðsetti eigin dauða og missti fjölskylduna

Áætlun kínversks karlmanns um að sviðsetja eigið andlát og hagnast síðan á líftryggingunni fór hörmulega úrskeiðis er eiginkona hans tók í kjölfarið eigið líf og barna þeirra svo fjölskyldan yrði sameinuð á ný, að því er BBC greinir frá.

Maðurinn var talinn látinn eftir að bíll hans fannst úti í á þó að lík hans hafi ekki fundist. Maðurinn hafði ekki greint eiginkonu sinni frá fyrirætlan sinni og hún taldi hann því vera látinn. Hún tók því nokkru síðar eigið líf og olli dauða tveggja barna þeirra er hún stökk með þau út í tjörn, eftir að hafa birt kveðjubréf á netinu.

Maðurinn, sem kínverskir fjölmiðlar segja bera ættarnafnið He, gaf sig fram við lögregluyfirvöld í Hunan-héraði á föstudag. Hann situr nú í varðhaldi eftir að hafa verið ákærður fyrir tryggingasvik og fyrir að valda viljandi eignaskaða.

Það var í byrjun september sem He keypti líftryggingu upp á eina milljón yuan (rúmar 17 milljónir kr.) án þess að segja konu sinni frá. Ríkisrekna útvarpsstöðin Rödd Kína segir konu hans þó hafa verið nefnda sem arfþegann.

Það var síðan 19. september sem He fékk lánaðan bíl og setti eigin dauða á svið í formi bílslyss, en að sögn lögreglu skuldaði hann yfir 100.000 yuan á þeim tímapunkti. Á fimmtudaginn í síðustu viku fundust eiginkona hans, fjögurra ára dóttir og þriggja ára sonur síðan látin í tjörn nærri heimili þeirra. Konan hafði áður birt kveðjubréf á WeChat-samfélagsmiðlinum, en þar sagði hún þau vera farin til fundar við eiginmann sinn og að það eina sem hún vildi væri að fjölskyldan væri sameinuð á ný.

Næsta dag gaf He sig fram við lögreglu, en áður hafði hann birt myndband á netinu sem nú hefur fengið mikla dreifingu. Þar sést hann gráta og segja að hann hafi fengið lánaðan pening til að greiða fyrir læknisaðstoð fyrir dóttur sína sem þjáðist af flogaveiki.

Atvikið hefur vakið mikla umræðu á kínverskum samfélagsmiðlum um fjárhagslegan þrýsting og málefni fjölskyldna.

• Blogga um frétt