Mikil vinna fram undan
Setja bókamerki
Þrátt fyrir að ríkisstjórn Bretlands hafi samþykkt drögin að Brexit-samningnum er mikil vinna fram undan, beggja vegna samningaborðsins. Þetta segir Michel Barnier, aðalsamningamaður Evrópusambandsins í viðræðum við bresk stjórnvöld um útgöngu Breta úr ESB.
Boðað hefur verið til fjölda funda innan ESB þar sem samningsdrögin verða rædd og áætlað er að Brexit-samningurinn verði samþykktur á fundi leiðtogaráðsins 25. nóvember, gangi allt samkvæmt áætlun.
Þrír ráðherrar í bresku ríkisstjórninni hafa tilkynnt Theresu May forsætisráðherra um afsögn sína í kjölfar þess að drögin að Brexit-samningnum voru samþykkt í gær. Ljóst er að ekki ríkir sátt um samninginn og að leið Breta út úr Evrópusambandinu er ekki enn orðin greið.
Umræða um samninginn fer nú fram á breska þinginu og hefur Theresa May, forsætisráðherra Bretlands, þurft að sæta harðri gagnrýni frá þingmönnum úr öllum flokkum. May varði samninginn og segir að í honum sé farið eftir vilja þjóðarinnar sem kaus að ganga úr Evrópusambandinu með þjóðaratkvæðagreiðslu fyrir rúmum tveimur árum. May segir að samningurinn tryggi skipulagða útgöngu.
Barnier segir að samningurinn, sem er alls 585 blaðsíður af þungum lagatexta, sé sanngjarn og taki tillit til beggja aðila og leggi grunninn að „metnaðarfullu nýju samstarfi“.
Donald Tusk, forseti leiðtogaráðs Evrópusambandsins, hrósaði Barnier í morgun fyrir vel unnin störf og segir hann að samningurinn tryggi hagsmuni allra 27 aðildarríkjanna og Evrópusambandsins í heild sinni.
Gígbarmurinn hækkað frá því í gær
Banna mengandi búnað sem leyfður er á Íslandi
Skiptir miklu meira máli en fólk grunar
Kostnaður meiri en milljón á fermetra
„Það þarf að vinna mikinn fjölda upp“
„Umsátursástand“
„Hvílir mikil leynd yfir þessu öllu“
Væri að ljúga ef ég segðist ekki stressaður