Bandaríska dómsmálaráðuneytið undirbýr nú ákærur á hendur Julian Assange, stofnanda WikiLeaks, samkvæmt bandarískum fjölmiðlum.
Assange hefur haldið til í sendiráði Ekvador í London síðan 2012. Þangað fór hann upphaflega til þess að forðast ákærur sænskra yfirvalda í kynferðisbrotamáli gegn honum.
Saksóknarar í Svíþjóð hafa fallið frá málinu en hann hefur dvalið áfram í sendiráðinu af ótta við að verða framseldur til Bandaríkjanna.
Samkvæmt frétt BBC er ekki ljóst hvaða ákæru Assange á yfir höfði sér. Mögulegt sé að hann hafi þegar verið ákærður en leynd hvíli yfir ákærunni þar til hann verði framseldur, ef það gerist.
Nafn Assange birtist í öðrum dómskjölum í máli manns sem sakaður er um kynferðisbrot gegn barni en svo virðist sem um mistök hafi verið að ræða. Saksóknari í því máli er sá sami og hefur rannsakað Assange.
Talið er að rannsókn Robert Mueller, sérstaks saksóknara, á tengslum Rússa við forsetakosningarnar í Bandaríkjunum 2016 bendi til þess að Rússar hafi notað WikiLeaks til að dreifa efni.
Áður hefur verið greint frá því að bandarískar njósnastofnanir telja að Rússar hafi viljað hjálpa Donald Trump að vinna forsetakosningarnar. Rússar neita þeim ásökunum.
WikiLeaks birti mörg þúsund „hakkaðra“ tölvupósta frá demókrötum í aðdraganda forsetakosninganna.