Vopnaðir menn rændu ítalskri konu sem starfaði sem sjálfboðaliði hjálparsamtaka í þorpi í suðausturhluta Kenýa í gærkvöldi. Greint var mannráninu í morgun. Árásarmennirnir skutu á íbúa í þorpinu og særðu fimm þeirra.
Að sögn lögreglu komu árásarmennirnir inn í þorpið Chakama í Kilifi-héraði um átta í gærkvöldi og skutu á þorpsbúa. Meðal þeirra sem sem særðust eru þrjú börn. Eitt þeirra, tíu ára gamall drengur fékk skot í augað. Ítalska konan sem þeir höfðu á brott með sér er 23 ára gömul.
Lögreglan segir að ekkert sé vitað um ástæðuna fyrir árásinni né heldur hverjir mannræningjarnir eru.