Umferðarteppa varð í vesturhluta Þýskalands þegar tankur við súkkulaðiverksmiðju gaf sig og tonn af súkkulaði flæddi út á veginn.
BBC segir að loka hafi þurfti veginum, sem er í bænum Westönnen, síðla dags á mánudag, vegna súkkulaðilekans.
Súkkulaðið var hins vegar fljótt að harðna og náði þá yfir um 10 fermetra svæði, þar sem 25 slökkviliðsmenn vopnaðir skóflum, heitu vatni og lóðlampa (e. blowtorch), hreinsuðu súkkulaðið af veginum.
In Westönnen, the streets are paved with chocolate. Still can't compete with the amount of chocolate I'll be eating this Christmas. https://t.co/M2hpcWtX2x
— John Layman (@layman_h) December 12, 2018
Starfsfólk Drei Meisters-súkkulaðiverksmiðjunnar aðstoðaði líka við hreinsun þessa súkkulaðineyðarástands.
„Þrátt fyrir þetta átakanlega atvik verður að teljast ólíklegt að súkkulaðilaus jól séu yfirvofandi,“ sagði í yfirlýsingu frá slökkviliði bæjarins.
Drei Meister fullvissaði þá þýska fjölmiðla um að framleiðsla myndi hefjast af fullum krafti strax í dag.