Vinsældir Macrons dvína

Enn minnka vinsældir Emmanuel Macrons Frakklandsforseta en í skoðanakönnun sem birtist í dagblaðinu Journal du Dimanche í morgun mælist stuðningur við forsetann aðeins 23 prósent. 45 prósent segjast mjög óánægð með störf hans.

Gulvestamótmælin hafa tekið sinn toll af vinsældum Macrons og segja franskir stjórnmálaskýrendur að hann þurfi að breyta stjórnarháttum sínum. 66 þúsund mótmælendur tóku þátt í mótmælunum um helgina, en mótmælin hófust í síðasta mánuði vegna skattahækkana á eldsneyti í Frakklandi.

Mótmælendur voru þó helmingi færri en í mótmælunum á undan og segir félagsfræðingurinn Herve Le Bras að það bendi til þess að krafturinn sé að minnka í mótmælunum. Eftir standi þó þessi mikla óánægja fólks með störf Macrons.

• Blogga um frétt