Dómsuppkvaðningu yfir Michael Flynn, fyrrverandi þjóðaröryggisráðgjafa Donalds Trump Bandaríkjaforseta, var frestað í dag í kjölfar þess að dómarinn í málinu, Emmet Sullivan, veitti honum val á milli þess að hljóta þungan fangelsisdóm strax eða að dómur yrði kveðinn upp síðar þegar rannsókn saksóknarans Roberts Mueller væri komin lengra á veg og Flynn hefði veitt rannsakendum frekari aðstoð í störfum þeirra. Sagði Sullivan Flynn hafa hegðað sér eins og föðurlandssvikari.
Fram kemur í frétt AFP að Mueller, sem rannsakar meint tengsl á milli forsetaframboðs Trumps og stjórnvalda í Rússlandi, hafi lagt til að Flynn yrði ekki dæmdur í fangelsi, fyrir að segja rannsakendum bandarísku alríkislögreglunnar FBI ósátt um tengsl hans við rússneska ráðamenn, vegna samvinnu hans við rannsakendur málsins. Verjendur Flynn óskuðu eftir frestun málsins.