Les Moonves, sem var yfirmaður bandaríska fjölmiðlafyrirtækisins CBS, mun ekki fá greiddan starfslokasamning en hann var rekinn frá störfum vegna ásakana um að hafa beitt fjölmargar konur kyn­ferðisof­beldi eða áreitt þær kynferðislega. Til stóð að hann fengi greiddar 120 milljónir Bandaríkjadala, sem svarar til 14,8 milljarða króna, við starfslok. 

Moonves hafði gríðarleg áhrif á rekstur CBS og undir hans stjórn varð CBS vinsælasta sjónvarpsstöð Bandaríkjanna. Hann var einnig í hópi þeirra stjórnenda í Hollywood sem nutu mestrar virðingar - allt þar til hann var ásakaður opinberlega um kynferðislega áreitni.

Í tveimur greinum sem birtust í The New Yorker í júlí og september var fjallað ítarlega um ásakanir á hendur honum af tólf konum. Hann lét af störfum í september. Á þeim tíma tilkynnti CBS að Moonves og fyrirtækið myndu setja 20 milljónir Bandaríkjadala í stuðning við #MeToo-hreyfinguna og til að tryggja konum jafnrétti á vinnustaðnum.

Í tilkynningu frá CBS í gær kemur fram að rannsókn fyrirtækisins hafi leitt í ljós að Moonves hafi gerst sekur um rangfærslur og að hann hafi verið ósamvinnuþýður við rannsókn málsins. Lögmaður Moonves gagnrýnir þessa ákvörðun CBS harðlega og segir hana byggja á tilhæfulausum ásökunum í garð skjólstæðings hans. 

Á föstudag staðfesti CBS að fyrirtækið hefði greitt leikkonunni Elizu Dushku 9,5 milljónir Bandaríkjadala í bætur en hún var skrifuð út úr handriti sjónvarpsþáttaraðarinnar Bull í kjölfar þess að hafa kvartað undan áreitni af hálfu aðalleikarans. 

Tengdar fréttir

Kynferðisbrot í Hollywood

Sakar Vin Diesel um kynferðisbrot á hóteli

• Höfðar mál gegn Weinstein og Disney
• Kanna ásakanir á hendur Russell Brand
• Ásakanir á hendur Brand veki upp spurningar
• Brand sakaður um kynferðisbrot

» Fleiri tengdar fréttir

• Blogga um frétt