Erlent | AFP | 24.1.2019 | 6:43 | Uppfært 25.1.2019 17:11

Frestar stefnuræðu uns deilan leysist

Donald Trump hefur ákveðið að fresta stefnuræðu sinni í bandaríska þinginu þar til fjárlagadeilan hefur verið leyst og segir hann ákvörðunina algjörlega sína. AFP

Donald Trump Bandaríkjaforseti hefur ákveðið að fresta stefnuræðu sinni í bandaríska þinginu þar til lausn hefur verið fundin á fjárlagadeilunni.

Nancy Pelosi, forseti fulltrúadeildar þingsins, meinaði Trump í gærkvöldi að flytja stefnuræðu sína í næstu viku af öryggisástæðum. Trump brást við með því að segja að Pelosi vildi ekki heyra sannleikann um öryggi á landamærum Bandaríkjanna og Mexíkó.

Frá þessu greinir hann í færslu á Twitter þar sem hann segir að Pelosi hafi boðið honum að halda stefnuræðuna á sínum tíma þrátt fyrir að lokun fjölmargra alríkisstofnana stæði enn yfir og að hann hefði samþykkt. „Hún skipti svo um skoðun vegna lokunarinnar, og lagði til að ræðan yrði haldin seinna.“ Trump heldur svo áfram og segir að það sé ekki hennar að ákveða hvenær hann haldi ræðuna. „Ég mun halda stefnuræðuna þegar lokunin er að baki,“ segir Trump loks.

As the Shutdown was going on, Nancy Pelosi asked me to give the State of the Union Address. I agreed. She then changed her mind because of the Shutdown, suggesting a later date. This is her prerogative - I will do the Address when the Shutdown is over. I am not looking for an....
— Donald J. Trump (@realDonaldTrump) January 24, 2019

Í færslunni segir hann jafnframt að það komi ekki til greina að flytja stefnuræðuna annars staðar þar sem enginn annar staður komist í hálfkvisti við þingsalinn hvað sögu, hefðir og mikilvægi varðar. Trump segist hlakka til að halda „stjórkostlega ræðu í náinni framtíð.“

....alternative venue for the SOTU Address because there is no venue that can compete with the history, tradition and importance of the House Chamber. I look forward to giving a “great” State of the Union Address in the near future!
— Donald J. Trump (@realDonaldTrump) January 24, 2019

Hluti alríkisstofnana í Bandaríkjunum hefur verið lokaður í á fimmtu viku frá því að Trump neitaði að skrifa undir fjárlögin nema demókratar í öldungadeild Bandaríkjaþings samþykki að veita fjármagni til byggingar veggjar á landamærum landsins að Mexíkó.

Bandaríkjaþing mun á fimmtudag kjósa um tvö aðskilin frumvörp sem geta, verði þau samþykkt, bundið endi á lokanir ríkisstofnana. Annað frumvarpið nýtur stuðnings Donald Trumps Bandaríkjaforseta og er þar gert ráð fyrir 5,7 milljörðum dollara í múrinn sem forsetinn vill reisa á landamærum Bandaríkjanna og Mexíkó. Hitt frumvarpið gerir einfaldlega ráð fyrir að fjárlög fáist framlengd til 8. febrúar.