Þrír látnir og fimm særðir í Utrecht

Víðtæk leit stendur yfir að árásarmanninum og hefur lögreglan meðal …
Víðtæk leit stendur yfir að árásarmanninum og hefur lögreglan meðal annars umkringt hús í nágrenni torgsins þar sem skotárásin átti sér stað. AFP

Þrír eru látnir eftir skotárás í Utrecht í Hollandi í morgun. Þetta staðfestir Jan van Zanen, borgarstjóri Utrecht, í samtali við fjölmiðla. Fimm eru særðir, þar af þrír lífshættulega. „Málið er rannsakað líkt og um hryðjuverk sé að ræða,“ segir Zanen.  

Árásarmaðurinn hóf skothríð á farþega í sporvagni við 24. október-torg í borginni rétt fyrir klukkan tíu að staðartíma í morgun. Lögreglan hefur birt mynd af hinum grunaða, Gökmen Tanis, 37 ára gömlum Tyrkja. Hann flúði af vettvangi á stolnum bíl, rauðum Renault Clio, og hefur lögreglan óskað eftir vitnum í tengslum við ferðir Tanis. Bíllinn fannst fyrir nokkru í nærliggjandi götu.

Talið er að Tanis hafi verið einn að verki en lögreglan útilokar ekki að hann hafi átt sér vitorðsmenn. Hæsta viðbúnaðarstigi vegna hryðju­verka­ógn­ar hef­ur verið lýst yfir í borg­inni en það hefur ekki verið gert áður. Öryggisgæsla hefur verið stóraukin á Schipol-flugvellinum í Amsterdam og landamæragæsla hefur sömuleiðis verið hert.

Lögreglan hefur umkringt íbúðarhúsnæði sem er í nokkur hundruð metra fjarlægð frá torginu þar sem árásin átti sér stað. Ekki hefur fengist staðfest hvort Tanis sé inni í byggingunni. Íbúum í borginni hefur verið ráðlagt að halda sig innandyra þar til frekari fregnir berast.

Fréttin hefur verið uppfærð

Herlögreglumenn hafa verið kallaðir út til að sinna öryggisgæslu á …
Herlögreglumenn hafa verið kallaðir út til að sinna öryggisgæslu á Schipol-flugvelli í kjölfar skotárásarinnar í Utrecht í morgun. AFP
mbl.is
Fleira áhugavert
Fleira áhugavert