Ástralska lögreglan hefur ákært kaþólskan prest fyrir að hafa beitt fimmtán ára gamlan pilt kynferðislegu ofbeldi fyrir rúmum tveimur áratugum.
Presturinn, sem er rúmlega sextugur, var handtekinn á þriðjudag en hann er ákærður fyrir að hafa ráðist á drenginn árið 1993 er hann var nemandi við menntaskóla í úthverfi Sydney, Fairfield. Presturinn hefur verið látinn laus gegn tryggingu en er gert að koma fyrir dóm að nýju 15. maí. Ákæran er í þremur liðum og hefur presturinn verið leystur frá störfum tímabundið.
Fyrr í mánuðinum var ástralski kardínálinn George Pell dæmdur í sex ára fangelsi í Melbourne fyrir að hafa beitt tvo drengi kynferðislegu ofbeldi.