21 árs karlmaður var í dag dæmdur í 30 ára fangelsi en hann nauðgaði og myrti búlgörsku blaðakonuna Viktoriu Marinovu 6. október í fyrra. Maðurinn slapp við lífstíðardóm eftir að hann játaði glæpinn.
Maðurinn, Severin Krasimirov, var handtekinn í þýska bænum Stade, skammt frá Hamborg. Þangað flúði hann eftir að hafa myrt Marinovu í heimabæ hennar, Ruse.
Krasimirov var einnig gert að greiða fjölskyldu fórnarlambsins 230.000 evrur, jafnvirði um 31,2 milljóna íslenskra króna, í skaðabætur.
Saksóknarar sögðu að ekkert benti til þess að árásin tengdist störfum Marinovu. Hún var að skokka í almenningsgarði þegar Krasimirov réðst á hana, nauðgaði henni, barði og kæfði.