Erlent | mbl | 12.11.2019 | 8:53 | Uppfært 28.12.2019 21:36

Búa sig undir verstu gróðureldaógn í sögu Ástralíu

Þyrla sleppir vatni yfir gróðurelda sem loga við smábæinn Nana Glen, 600 km norður af Sydney. Yfirvöld hafa varað við að eldarnir geti breiðst hratt út í dag. AFP

Íbúar á stóru svæði við austurströnd Ástralíu búa sig nú undir eina þá verstu gróðureldaógn sem Ástralía hefur staði frammi fyrir.

Gróðureldar loga nú á meira en 50 stöðum í New South Wales og eru aðstæður fyrir eldana sagðar verða „hörmulegar“ í dag. Hafa yfirvöld varað við að eldarnir muni breiðast hratt út í fylkinu vegna sterkra vinda og hás hitastigs þannig að lífi manna og dýra geti staðið ógn af.

Um sex milljónir manna búa í fylkinu.

Brunninn skógur eftir gróðurelda í nágrenni borgarinar Sydney. AFP

Frétt af mbl.is

Neyðarástandi lýst yfir í Sydney

Hafa íbúar á þeim svæðum sem stafar mikil hætta af eldunum verið hvattir til að halda sig fjarri kjarrlendissvæðum og að flýja heimili sín áður en eldarnir magnast upp. Rúmlega 600 skólum í New South Wales hefur verið lokað vegna eldanna.

Gladys Berejiklian, fylkisstjóri New South Wales, hefur lýst yfir sjö daga neyðarástandi vegna eldanna. BBC hefur eftir Berejiklian að dagurinn í dag muni snúast um að „verja líf og eignir og reyna að tryggja að allir séu jafn heilir á húfi og hægt sé“.

Hestur og hundur sem fluttir voru í skýli vegna gróðureldanna sem nú loga í New South Wales. Reykjarmökkinn leggur þó einnig þarna yfir. AFP

Frétt af mbl.is

Sydney í hættu vegna eldanna

Þegar eru þrír látnir og þúsundir hafa þurft að yfirgefa heimili sín í norðurhluta ríkisins. Þar hafa yfir 150 hús orðið eldinum að bráð en tugir kjarrelda geisa þar. Undanfarna mánuði hafa 11 þúsund ferkílómetrar lands, svæði sem er stærra en Jamaíka eða Kosovo, orðið eldinum að bráð.

Yfirvöld segja ástandið sem fylkið stendur nú frammi fyrir geta orðið „hættulegustu gróðureldaviku sem landið hefur nokkru sinni staðið frammi fyrir“.

Eldvarnarefni er hér sleppt úr flugvél í nágrenni Sydney, í von um að ná stjórn á gróðureldunum sem loga í New South Wales. AFP

Frétt af mbl.is

Metfjöldi gróðurelda

Hafa sérfræðingar raunar líkt spánni fyrir daginn í dag við hinn svo kallaða „svarta laugardag“ þegar 173 fórust í gróðureldum í Victoria-fylki árið 2009.

„Undir stórslysalegum aðstæðum þá geta eldar sem kvikna og ná að loga þróast mjög hratt yfir í að verða að stórum eldum mjög, mjög auðveldlega,“ segir Shane Fitzsimmons lögreglustjóri í New South Wales.

Er þetta í fyrsta skipti sem viðvörun um „hörmulega“ gróðurelda hefur verið gefin út fyrir úthverfi Sydney og byggðirnar norður og suður af borginni. Er þetta raunar í fyrsta skipti frá eldunum mannskæðu 2009 sem slík viðvörun hefur verið gefin út.