Donald Trump Bandaríkjaforseti hunsaði ráð háttsettra embættismanna þegar hann sagði að Úkraínumenn hefðu skipt sér af forsetakosningunum vestanhafs árið 2016. Þetta kom fram í máli fyrrverandi ráðgjafa Trumps.
Fiona Hill, fyrrverandi sérlegur ráðgjafi Trumps í málefnum Rússlands sem sat í öryggisráði Bandaríkjanna, sat í kvöld fyrir svörum á fundi þingmannanefndar fulltrúadeildar Bandaríkjaþings þar sem meint embættisbrot forsetans eru rannsökuð.
Hill sagði að Trump hefði þess í stað notið ráðgjafar lögmanns síns, Rudy Giuliani. Hún sagði að orðrómur um að Úkraínumenn hefðu skipt sér af kosningunum væri algjörlega úr lausu lofti gripinn.
„Sannleikurinn er sá að Rússar voru það erlenda ríki sem réðst kerfisbundið á stofnanir okkar fyrir kosningarnar árið 2016,“ sagði Hill. Hún bætti því að Rússar væru að búa sig undir svipað vegna forsetakosninganna á næsta ári.
Rannsóknin er til komin vegna meintra tilrauna Trump til að þrýsta á úkraínsk yfirvöld að hefja rannsókn á Joe Biden, fyrrverandi varaforseta Bandaríkjanna og núverandi forsetaframbjóðanda.
Það er ólöglegt vestanhafs að sækja sér aðstoð út fyrir Bandaríkin til að notfæra sér í eigin tilgangi í kosningum, eins og talið er að Trump hafi ætlað sér að gera. Forsetinn segist ekki hafa gert neitt rangt.
Óljósar heimildir hafa bent til þess að það hafi verið Úkraínumenn sem voru með puttana í kosningunum fyrir þremur árum en ekki Rússar. Trump bað Volodimír Zelenskí, forseta Úkraínu, að kanna þessar ásakanir sem og rannsaka einn sinn helsta pólitíska andstæðing; Joe Biden.
Hill sagði að það væri ljóst að forseti Úkraínu hefði verið beittur þrýstingi.