Austurríski Frelsisflokkurinn hefur rekið Heinz-Christian Strache, fyrrverandi formann, úr flokknum. Strache gegndi embætti varakanslara í ríkisstjórn Þjóðarflokksins og Frelsisflokksins, en sagði af sér embætti í maí eftir að þýskir fjölmiðlar greindu frá því, og birtu myndbönd, að Strache hefði lofað meintum rússneskum fjárfesti að fá aðstoð við gerð ríkissamninga gegn því að fá pólitískan stuðning.
Þetta átti sér stað á fundi á spænsku eyjunni Ibiza sem var myndaður með leynd rétt fyrir þingkosningarnar árið 2017. Rússneski auðjöfurinn reyndist fréttamaður undir fölsku flaggi.
Í kjölfarið var boðað til nýrra þingkosninga í Austurríki, en þar tapaði Frelsisflokkurinn tíu prósentustigum frá kosningunum tveimur árum áður. Hófust þá flóknar stjórnarmyndunarviðræður sem enn sér ekki fyrir endann á. Á blaðamannafundi í dag boðuðu leiðtogar Frelsisflokksins að nú skyldi bundinn endi á „Strache-kaflann“ sem hefur reynst flokknum erfiður.
Strache hafði, er hann sagði af sér formennsku í maí, boðað að hann hygðist segja skilið við stjórnmál, en á föstudag greindi hann frá því á Facebook að sökum stuðnings sem hann hefði fundið fyrir síðustu vikur væri hann að „íhuga endurkomu í stjórnmál árið 2020“. Kemur ákvörðun flokksleiðtoga í kjölfar þess.