Öflugur jarðskjálfti banaði að minnsta kosti 21 í austurhluta Tyrklands í gærkvöldi og yfir þúsund manns eru slasaðir. Hús féllu sum eins og spilaborgir nærri upptökum skjálftans, sem var af stærðinni 6,8. Enn er yfir 30 manns saknað.
Skjálftinn olli miklu tjóni í Elazig-héraði og þar hafa björgunarsveitir unnið að því að leita fólks í húsarústum í nótt. Ríkisfréttaveitan Anadolu greinir frá því að óléttri konu hafi verið bjargað í nótt, eftir að hún hafði legið undir braki í tólf klukkustundir, en skjálftinn reið yfir laust fyrir kl. 21 í gærkvöldi að staðartíma.
Recep Tayyip Erdogan Tyrklandsforseti segir að allt verði gert til þess að hjálpa fólkinu sem varð fyrir barðinu á skjálftanum. „Við stöndum með okkar fólki,“ sagði forsetinn á Twitter.
Tyrkland er á brotabelti og þar er algengt að jarðskjálftar valdi tjóni. Árið 1999 reið hörmungarskjálfti yfir vesturhluta landsins, en sá var 7,4 að stærð og olli gríðarlegu manntjóni. Yfir 17.000 manns létust, þar af yfir 1.000 í Istanbúl, stærstu borg landsins.