Horfin frænka fagnaði ári rottunnar
Setja bókamerki
Föðursystir leiðtoga Norður-Kóreu, sem ekki hefur sést opinberlega í um það bil sex ár, tók þátt í nýársfögnuði yfirvalda í höfuðborginni Pjongjang í gær, laugardag.
Frá þessu greina norðurkóreskir ríkisfjölmiðlar og á mynd sem dreift hefur verið frá athöfninni í gærkvöldi glittir í hina 73 ára gömlu Kim Kyong-hui, frænku leiðtogans Kim Jong-un. Nafn hennar var einnig á lista yfir þá sem sóttu viðburðinn.
Árum saman hafa orðrómar verið uppi um að litli frændi hafi eitrað fyrir þessari föðursystur sinni eða komið henni fyrir kattarnef með öðrum hætti, í valdabaráttu eftir andlát Kim Jong-il, fyrri leiðtoga landsins.
Vitað er fyrir víst að Kim Jong-un lét taka eiginmann hennar af lífi fyrir föðurlandssvik og spillingu, í desember 2013, en sá var valdamikill embættismaður í ríkinu og er talið að leiðtoginn hafi látið drepa hann til að tryggja völd sín.
Kim Kyong-hui var nokkuð áberandi við hlið bróður síns á síðustu árunum fyrir andlát hans. Hún var meðal annars fjögurra stjörnu hershöfðingi í norðurkóreska hernum og átti einnig sæti í stjórnmálaráðinu Politburo. Þá er hún sögð hafa undirbúið litla frænda, Kim Jong-un, undir að gerast arftaki föður síns.
Búin að vera heilsuveil
Norður-Kórea er lokaðasta land veraldar og afar erfitt er fyrir fjölmiðla að afla sér upplýsinga um hvað er í raun og veru í gangi þar innanlands. Einmitt þess vegna komast gróusögur um andlát og aftökur oft á flug þegar einhverjir leikendur í stjórnmálalífi landsins sjást ekki til lengri tíma, en tekið skal fram að leyniþjónusta Suður-Kóreu hafði áður vísað því á bug að Kim Kyong-hui hefði verið tekin af lífi.
Samkvæmt þeirra upplýsingum hefur hún verið við slæma heilsu undanfarin ár, en í frétt AP er haft eftir sérfræðingum í málefnum Norður-Kóreu að hún hafi lengi þjáðst af lifrar- og hjartavandamálum.
Associated Press fjallar um þetta mál
Kostnaður meiri en milljón á fermetra
Telur forsendur fyrir vaxtalækkun
Eyjafjarðarbraut lokað vegna alvarlegs umferðarslyss
Skemmtiferðaskip hætt komið nærri Viðey
Shakespeare fannst í skókassa
Skiptir miklu meira máli en fólk grunar