Einn skammtur öruggur fyrir aldraða og veitir vernd

Einn skammtur af Covid-19 bóluefni AstraZeneca og Oxford háskóla virðist veita rúmlega 80% vernd gegn alvarlegum veikindum af völdum Covid-19, samkvæmt fyrstu niðurstöðum rannsóknar sem birt var í dag.

Niðurstöðurnar, sem enn á eftir að ritrýna, bætast við fyrri vísbendingar sem gefa til kynna að bóluefnið sé bæði öruggt og skilvirkt fyrir eldra fólk.

Rannsóknin ætti því að auka traust fólks á efninu, en yfirvöld í Þýskalandi, Frakklandi, á Spáni og víðar hafa lagst gegn því að gefa fólki sem er yfir 65 ára aldri Covid-19-bóluefni fyrirtækisins. Þá ákváðu Danir að sprauta eldri íbúa landsins ekki með efninu.

Frétt af mbl.is

352 tilkynningar vegna gruns um aukaverkanir

Meiri vernd en með Pfizer

Rannsóknin sem hér er vísað til var framkvæmd í Bristol-háskóla. Aldraðir sjúklingar, 80 ára og eldri, tóku þátt í henni en þeir höfðu allir verið lagðir inn á spítala í Bretlandi með öndunarfærasjúkdóma. Allir sjúklingarnir voru skimaðir fyrir kórónuveirunni, og var þeim síðan skipt í tvo hópa.

Rannsakendur komust að því að níu af 36 Covid-19-sjúklingum höfðu fengið bóluefni AstraZeneca, og 53 af 90 þeirra sem greindust neikvætt.

Munurinn á hlutfalli þessara hópa, eftir að hafa fengið eina bóluefnissprautu frá AstraZeneca, gaf til kynna að skilvirkni efnisins væri 80,4%, að sögn vísindamannanna.

Ein sprauta af Pfizer-bóluefninu veitti hins vegar 71,4% vernd, samkvæmt sömu rannsókn. Bæði bóluefni AstraZeneca og Pfizer voru þróuð þannig að hver einstaklingur þarf tvær sprautur af efninu. Í tilviki Pfizer líða þrjár vikur á milli skammta en í tilfelli AstraZeneca líða þrír mánuðir á milli skammta.

Frétt af mbl.is

Einn skammtur af bóluefni veitir mikla vernd

• Blogga um frétt