Ísraelskir þingmenn leystu þing landsins frá störfum í dag. Með þessu verður blásið til fimmtu kosninga í Ísrael á tímabili sem er styttra en fjögur ár.
Yair Lapid, utanríkisráðherra landsins, mun taka við stjórnartaumunum hjá bráðabirgðaríkisstjórn á miðnætti að staðartíma.
92 þingmenn kusu með tillögunni um upplausn þingsins en enginn kaus gegn henni.
Áður var við stjórnvölinn bandalag átta flokka sem höfðu afar mismunandi sjónarmið.
Er þessi niðurstaða sögð „pólitísk líflína“ fyrir Benjamín Netanjahú, fyrrverandi forsætisráðherra Ísraels.
Það er einungis ár liðið síðan hann hætti í embætti en sem stendur er réttað yfir honum vegna meintrar spillingar. Hann hefur neitað að hætta í stjórnmálum og mælist fylgi flokks hans, Likud, mest í skoðanakönnunum.
Stjórnarsamstarfið sem nú hefur verið leyst upp var nokkuð flókið og spáðu margir sérfræðingar því stuttum líftíma. Um var að ræða átta flokka bandalag sem sameinaði pólitíska andstæðinga frá hægri, vinstri og miðju og innifól fyrsta sjálfstæða framboð Araba sem gengið hefur til liðs við ísraelskan þingmeirihluta. Reyndust flokkarnir, sem voru sameinaðir í þeirri afstöðu sinni að koma Netanjahú frá völdum, hafa of ólíkar skoðanir á ýmsum efnum, t.a.m. málefnum er varða Palestínu.