Tvö börn létust þegar maður keyrði strætisvagn í gegnum vegg á dagvist fyrir börn nærri borginni Montreal í Kanada í dag. Ökumaðurinn var handtekinn á staðnum grunaður um manndráp en talið er að maðurinn hafi vísvitandi ekið inn í húsið.
Þó nokkur börn voru föst undir strætisvagninum þegar lögregla og viðbragðsaðilar komu á vettvang. Eitt barn var úrskurðað látið á staðnum en annað lést í sjúkrabíl á leiðinni á spítala á svæðinu.
Sex börn særðust en eru ekki talin í lífshættu.
Faðir eins barnsins yfirbugaði ökumanninn fyrir utan strætisvagninn. Að sögn sjónarvotts var ökumaðurinn hálfnakinn. Ökumaðurinn er 51 árs og hefur aldrei brotið af sér áður.
Lögreglan á svæðinu rannsakar nú málið en talið er að voðaverkið hafi verið framið af ásetningi þó að enn sé óljóst hvað vakti fyrir manninum.