Tveir fangar í Bandaríkjunum náðu að brjóta sér leið í gegnum vegg með tannbursta en voru handteknir nokkrum tímum seinna á veitingastað sem selur pönnukökur skammt frá fangelsinu.
Þetta voru þeir John Garza, 37 ára, og Arley Nemo, 43 ára, sem var saknað úr fangelsinu Newsport News Jail Annex síðastliðið mánudagskvöld í Virginíu-ríki í Bandaríkjunum. Garza sat í gæsluvarðhaldi vegna lítilsvirðingar í garð dómstóla og vegna brots á skilorði. Nemo sat inni vegna kreditkortasvindls og fölsun.
Fangarnir tveir bjuggu sér til verkfæri með tannbursta og ónefndum hlut úr málmi og notfærðu sér galla í vegg á fangelsinu til að sleppa úr fangelsinu. Frelsi þeirra var skammvinnt en þeir voru handteknir aftur á þriðjudagsmorgun. Þá kom lögreglan að þeim á veitingastaðnum IHOP í bænum Hampton.
Ekki segir í tilkynningu lögreglu hvort mennirnir höfðu fengið sér pönnukökur eða ekki.