Robert Hanssen, fyrrverandi njósnari bandarísku alríkislögreglunnar FBI, sem seldi Rússum trúnaðargögn á 9. og 10. áratug síðustu aldar, lést í fangelsi í Colorado-ríki í Bandaríkjunum í dag.
Hann seldi Sovétmönnum og síðar Rússum þúsundir leynilegra skjala bandaríska ríkisins allt frá árinu 1985, þangað til hann var handtekinn árið 2001. Þar á meðal voru kjarnorkustríðsáætlanir og njósnaforrit sem Bandaríkin notuðu.
Hanssen seldi einnig upplýsingar um bandaríska njósnara í Sovétríkjunum fyrrverandi í staðinn fyrir demanta og háar fjárupphæðir.
Bandarískur alríkisdómari dæmdi Hanssen til lífstíðarfangelsis án möguleika á reynslulausn í maí 2002. Hanssen var dæmdur sekur um að hafa stundað njósnir fyrir rússnesk yfirvöld.
Fjallað var um mál Hanssen í hlaðvarpinu Í ljósi sögunnar á síðasta ári.