George W. Bush, forseti Bandaríkjanna, hefur brugðist hart við dómi hæstaréttar Massachusetts sem komst í gær að þeirri niðurstöðu að leyfa yrði hjónabönd samkynhneigðra og að staðfest sambúð, eins og leyfð er í Vermont-ríki, veiti ekki sambærileg réttindi. Segir Bush að ef fallist verði á dóminn þurfi að breyta stjórnarskrá landsins á þann veg að hjónabönd samkynhneigðra verði með skýrum hætti bönnuð.
Í skriflegri yfirlýsingu vegna málsins segir Bush að dómurinn valdi afar miklum vandræðum. „Hjónabandið er heilagt og það á sér stað milli karls og konu,“ segir í yfirlýsingunni. Þar segir jafnframt að ef aðgerðasinnaðir dómarar krefjist þess að hjónabandið verði endurskilgreint með dómsúrskurði, sé breyting á stjórnarskránni sem tryggi að samkynhneigðir fái ekki að giftast, eina lausnin á málinu. „Við verðum að gera það sem er lagalega nauðsynlegt til að verja heilagleika hjónabandsins“ segir í yfirlýsingu Bush.