Hélt að hann væri eyðnismitaður og myrti fjölskyldu sína

Indverskur maður myrti fjölskyldu sína og reyndi að fremja sjálfsmorð í örvæntingu sinni eftir að honum hafði ranglega verið tjáð að hann væri haldinn eyðni. „Veröld mín hrundi algerlega eftir að ég fékk sjúkdómsgreininguna, sem svo reyndist röng,“ sagði maðurinn, Madhava Rao, sem er 35 ára gamall. Hann er nú á sjúkrahúsi eftir að hafa gleypt eitur í því skyni að binda endi á líf sitt.

Rao grét jafnframt af harmi yfir dauða konu sinnar, sem var 28 ára gömul og tveggja sona þeirra Raos, sem voru eins og þriggja ára gamlir.

„Ég hafði áhyggjur af því að fjölskylda mín myndi þjást eftir dauða minn og ég vildi ekki að það gerðist,“ sagði Rao og sagðist af þessum sökum hafa ákveðið að myrða þau.

Rao sagðist hafa leitað á heilsugæslustöð til blóðsýnatöku fyrir tveimur vikum síðan, en hann hafði haft hita, magaverki og sýkingu í augum. Var honum sagt að hann væri ekki haldinn eyðni, eins og hann hafði óttast. Honum batnaði hins vegar ekki og ákvað því að fara á aðra heilsugæslustöð sem svo tilkynnti honum símleiðis að hann væri með eyðni.

Rao sagðist hafa haldið heim og barið konu sína í höfuðið með þungum hlut og þarnæst kyrkt syni sína. Þá reyndi hann að gleypa eitur en lifði af og var sendur með hraði á sjúkrahús.

Rao á yfir höfði sér málssókn fyrir að hafa myrt fjölskyldu sína.

• Blogga um frétt