Áfengislög í Svíþjóð tekin fyrir af Evrópudómstólnum

Framkvæmdastjórn Evrópusambandsins (ESB) ætlar að höfða mál gegn sænska ríkinu, vegna gildandi áfengislaga í Svíþjóð. Lögin gera sænskum borgurum ókleift að panta sér áfengi erlendis frá, svo sem með því að nota Netið, að því er fram kemur í fréttabréfi sænska þingsins. Samkvæmt sænskum áfengislögum hefur ríkið einkarétt á innflutningi áfengis.

Framkvæmdastjórn ESB segir að einkaréttur sænska ríkisins á að flytja inn áfengi, samræmist ekki reglum ESB um frjálst flæði vöru milli aðildarríkja sambandsins. Sænsk stjórnvöld halda því hins vegar fram að einkasala ríkisins á áfengi sé nauðsynleg af heilsuverndarástæðum og til þess að gæta þess að aldurstakmörk til áfengiskaupa séu virt. Þá telja stjórnvöld í Svíþjóð mikilvægt að gæta þess að skattar séu greiddir af innflutningunum.

Einokun sænskra stjórnvalda á áfengisinnflutningi til Svíþjóðar hefur margoft verið tekin fyrir milli sænsku stjórnarinnar og framkvæmdastjórnar ESB, en hingað til hefur ekki náðst samkomulag um málið.

Að því er fram kemur í fréttabréfi sænska þingsins, hefur framkvæmdastjórnin ákveðið að fara með málið fyrir Evrópudómstólinn. Þar segir að sendinefnd Svía í Brussel hafi verið gert viðvart um þessa ætlan framkvæmdastjórnarinnar, en að lagaskjöl hafi enn ekki verið lögð fyrir dóminn.

• Blogga um frétt