Árlegur listi yfir 10 verstu einræðisherra heims birtur

Búið er að birta árlegan lista yfir 10 verstu einræðisherra í heiminum í dag. Það er tímaritið PARADE sem stendur fyrir valinu en það byggir listann á skýrslum frá mannúðarsamtökum víða um heim s.s. Mannréttindavaktarinnar og Amnesty International. Í efsta sætinu, líkt og í fyrra, situr Omar al-Bashir einræðisherra í Súdan.

Listanum fylgir lýsing á því hvað einræðisherra sé en þar segir m.a. að einræðisherra sé þjóðarleiðtogi sem stýrir þegnum ríkisins af eigin geðþótta. Ekki sé hægt að fjarlægja hann eftir laganna leiðum. Þá segir að verstu einræðisherrarnir traðki á mannréttindum ríkisborgaranna.

Fram kemur að á meðan þrír af verstu einræðisherrunum frá því í fyrra haldi sínum sætum þá hafi tveir, þeir Muammar Gaddafi í Líbýu og Pervez Musharraf, forseti Pakistans, fallið af topp 10 listanum. Það sé ekki vegna góðrar hegðunar heldur vegna þess að aðrir einræðisherrar hafi einfaldlega verið verri.

Topp 10 listinn er annars eftirfarandi:

1. Omar al-Bashir í Súdan. Hann er 62ja ára gamall og hefur verið við völd frá því 1989. Hann vermir toppsætið annað árið í röð.

   Fram kemur að frá því í febrúar árið 2003 hafi um 180.000 manns látið í lífið í landinu í trúarofsóknum og þjóðernishreinsunum sem hann stendur á bak við í Darfur. Þá hafi tvær milljónir manna þurft að flýja heimili sín.

2. Kim Jong-il er leiðtogi Norður-Kóreu. Hann er 63ja ára gamall og hefur verið við völd frá 1994. Hann var einnig í öðru sæti í fyrra.

   Fram kemur að íbúar Norður-Kóreu séu undir járnhæl einræðisherrans. Traðkað sé á fjölmiðlafrelsi og það sama eigi við um önnur grundvallar mannrétti t.d. hvað varðar pólitískan rétt fólks. Þá er talið að um 250.000 manns séu í svokölluðum „endurmenntunarbúðum“ til að kenna þeim rétta hugsun. Þá eru íbúar víða vannærðir. Að sögn Sameinuðu þjóðanna mælist sjö ára norður-kóreskur drengur vera um 20 cm lægri en jafnaldri hans frá Suður-Kóreu. Þá er sá fyrrnefndi um 10 kílóum léttari.

3. Than Shwe í Búrma (Myanmar). Hann er 72ja ára gamall og hefur verið við völd frá 1992. Hann vermir sama sæti og frá því í fyrra.
4. Robert Mugabe í Simbabve. Hann er 81 árs og hefur verið við völd frá því 1980. Hann sat í níunda sætinu í fyrra.
5. Islam Karimov í Úsbekistan. Hann er 67 ára gamall og hefur verið við völd frá því 1990. Hann vermdi 15. sætið í fyrra.
6. Hu Jintao forseti Kína. Hann er 63ja ára gamall og hefur verið við völd frá 2002. Hann var í fjórða sæti í fyrra.
7. King Abdullah í Sádi-Arabíu. Hann er 82ja ára gamall og hefur verið við völd frá 1995. Hann var í fimmta sæti í fyrra.
8. Saparmurat Niyazov í Turkmenistan. Hann er 65 ára gamall og hefur verið við völd frá 1990. Hann vermdi áttunda sætið í fyrra.
9. Seyed Ali Khamane’i í Íran. Hann er 66 ára gamall og hefur verið við völd frá 1989. Hann var í 18 sæti í fyrra.
10. Teodoro Obiang Nguema í Miðbaugs-Gíneu. Hann er 63ja ára gamall og hefur verið við völd frá 1979. Hann stendur í stað frá því í fyrra.

Listi Parade

Kim Jong-Il leiðtogi Norður-Kóreu er annar á listanum annað árið í röð. Reuters

• Blogga um frétt