Senda inn efni
Aron Einar Gunnarsson Eggert Jóhannesson
Aron Einar: „Kominn í frábært form“
„Það er lítið að gerast í samningamálunum. Ég er hins vegar alveg rólegur. Mér líður vel í Coventry og held bara áfram að standa mig vel. Það náðust ekki samningar á milli mín og félagsins í haust og ég veit ekki hvað forráðamenn liðsins eru að hugsa, hvort þeir séu að bíða eftir því að lið komi með tilboð í mig eða ætli að bjóða mér nýjan og bættan samning,“ sagði landsliðsmaðurinn Aron Einar Gunnarsson leikmaður enska 1. deildarliðsins Coventry við Morgunblaðið í gær.
Aron á eitt og hálft ár eftir af samningi sínum við Coventry sem hann gekk til liðs við frá hollenska liðinu AZ Alkmaar. Aron átti afar góðu gengi að fagna með enska liðinu á sinni fyrstu leiktíð. Hann var fastamaður í liðinu og var eftir tímabilið útnefndur leikmaður ársins hjá félaginu.
Aron var inntur eftir því hvort hann sæi fyrir sér að fara frá Coventry núna í janúarglugganum.
„Maður veit aldrei hvað gerist. Ef eitthvað kemur upp þá held ég að Coventry skoði það. Coventry er félag sem er byggt upp á ungum leikmönnum og ef því býðst gott tilboð í leikmenn þá selur það þá. Ég væri meira en til í að skoða það ef eitthvað tilboð kæmi upp á borðið.“
Nánar er rætt við Aron Einar í Morgunblaðinu í dag.
Nánar í Morgunblaðinu. Smelltu hér til að gerast áskrifandi.
Til baka