Bæjarstjóri í Torredonjimeno á Suður-Spáni hefur gert það að reglu að fimmtudagskvöld skuli vera kvennakvöld og karlmönnum sé skylt að halda sig innandyra og annast húsverk þau kvöld.
Eingöngu konur mega sjást á götum bæjarins þessi kvöld og mega karlmenn, sem hætta sér út af heimilum sínum, eiga von á fimm evru sekt sem samsvarar rúmum 400 krónum, að sögn Reuters-fréttastofunnar. Ekki er karlpeningur Torredonjimeno yfir sig hrifinn af þessu uppátæki bæjarstjórans. „Hver heldur bæjarstjórinn að hann sé að ætla að sekta mig ef ég fer á bar?“ spyr bæjarbúinn Jose Damas hneykslaður. „Ég fer á bar á fimmtudegi og ef ég fæ sekt borga ég hana, en þeir skulu þá fá að hitta mig í réttarsalnum.“