Walt Disney-fyrirtækið hefur beitt sér þann veg að dótturfélagið Miramax dreifi ekki heimildarmynd eftir kvikmyndaleikstjórann Michael Moore þar sem sett er fram gagnrýni á Bush Bandaríkjaforseta, að því er New York Times skýrir frá í dag og vitnar til fulltrúar beggja fyrirtækjanna.
Í kvikmyndinni, sem ber nafnið „Farenheit 911“, er stefna Bush fyrir hryðjuverkaárásirnar á Bandaríkin 11. september árið 2001, gagnrýnd og lýst tengslum Bush-fjölskyldunnar við sádi-arabíska auðkýfinga, þar á meðal fjölskyldu al-Qaeda-leiðtogans Osama bin Laden.
Myndina áformar Moore að sýna á kvikmyndahátíðinni í Cannes síðar í maí en hún fæst ekki sýnd í Bandaríkjunum meðan bann Disney-fyrirtækisins gildir. Í henni er lýst hlutdeild stjórnar Bush við að bjarga skyldmennum bin Laden burt frá Bandaríkjunum í kjölfar hryðjuverkaárásanna.
Talsmenn Miramax hyggst freista þess að reyna að fá Disney ofan af banninu enda telja forsvarsmenn félagsins það falla utan sérstakra samstarfssamninga fyrirtækjanna. Talsmenn Disney segja dreifingarbannið ófrávíkjanlegt.