Brad Pitt og Jennifer Aniston skilin

Bandarísku kvikmyndastjörnurnar Brad Pitt og Jennifer Aniston eru skilin að borði og sæng. Þau hafa verið gift í fjögur og hálft ár. Í sameiginlegri yfirlýsingu, sem Pitt og Aniston sendu frá sér í gærkvöldi, segjast þau hafa tekið þessa ákvörðun að vel yfirlögðu ráði og skilji sem góðir vinir.

Pitt, sem er 41 árs, og Aniston, sem er 35 ára, giftu sig í júlí árið 2000 en þau höfðu þá verið saman í tvö ár. Um 200 manns komu í brúðkaupsveisluna sem var glæsileg og sögð hafa kostað 1 milljón dala. Allt virtist leika í lyndi næstu árin. Í fjölmiðlum komu þó fréttir um að þau hjónin væru að reyna að eignast barn en án árangurs. Og síðustu mánuði birtu slúðurblöð fréttir um að brestir væru komnir í hjónabandið. Var m.a. gefið í skyn, að Pitt ætti í sambandi við leikkonuna Angelinu Jolie, en þau leika saman í myndinni Mr and Mrs Smith, sem frumsýnd verður í júní.

Þau Pitt og Aniston eyddu þó áramótunum saman á eynni Anquilla á Karíbahafi ásamamt Courteney Cox, sem lék með Aniston í þáttunum Vinum, og eiginmanni hennar, David Arquette.

Hjónaband þeirra Aniston og Pitt var fyrsta hjónaband beggja. Pitt var um tíma trúlofaður leikkonunni Gwyneth Paltrow og Aniston átti í sambandi við leikarann Tate Donovan.

• Blogga um frétt