Vilhjálmur öruggur sigurvegari í prófkjöri sjálfstæðismanna

Vilhjálmur Þ. Vilhjálmsson fékk 6424 atkvæði 1. sæti í prófkjöri Sjálfstæðisflokksins í Reykjavík sem fram fór á föstudag og laugardag. Alls voru 20.978 á kjörskrá en atkvæði greiddu 12.453 eða 59,4% þeirra. Gild atkvæði voru 11.920 og fékk Vilhjálmur 53,9% þeirra. Í öðru sæti varð Hanna Birna Kristjánsdóttir og Gísli Marteinn Baldursson varð í 3. sæti.

Þeir Vilhjálmur og Gísli Marteinn buðu sig báðir fram í 1. sætið og fékk Gísli Marteinn 5193 atkvæði í það sæti. Þau Hanna Birna og Júlíus Vífill Ingvarsson buðu sig bæði fram í 2. sætið og fékk Hanna Birna 6290 atkvæði í það sæti en Júlíus Vífinn 2924. Flest atkvæði í prófkjörinu fékk Hanna Birna, 10.142 talsins, en Kjartan Magnússon, sem endaði í 4. sæti, fékk næstflest, eða 9353.

Prófkjörsreglur Sjálfstæðisflokksins mæla svo fyrir um að hafi helmingur þeirra sem á kjörskrá eru við lok kjörfundar kosið, er kjörnefnd skylt að gera tillögu til fulltrúaráðsfundar sjálfstæðisfélaganna í Reykjavík um að framboðslistinn verði í samræmi við niðurstöður prófkjörsins enda hafi frambjóðendur hlotið atkvæði í eitthvert sæti á að minnsta kosti helmingi gildra kjörseðla. Tillaga er þá gerð um að frambjóðendur skipi framboðslistann í þeirri röð sem niðurstaða prófkjörsins hefur skipað þeim í. Samkvæmt þessu er niðurstaða prófkjörsins bindandi gagnvart kjörnefnd fyrir þá sem hlutu kosningu í sæti 1 til 9.

Niðurstaða prófkjörsins var þessi:

1. Vilhjálmur Þ. Vilhjálmsson með 6.424 atkvæði í 1. sæti.
2. Hanna Birna Kristjánsdóttir með 6.392 atkvæði í 1.-2. sæti.
3. Gísli Marteinn Baldursson með 6.694 atkvæði í 1.-3. sæti.
4. Kjartan Magnússon með 6.264 atkvæði í 1.-4. sæti.
5. Júlíus Vífill Ingvarsson með 5.943 atkvæði í 1.-5. sæti.
6. Þorbjörg Helga Vigfúsdóttir með 6.629 atkvæði í 1.-6. sæti.
7. Jórunn Frímannsdóttir með 6.422 atkvæði í 1.-7. sæti.
8. Sif Sigfúsdóttir með 5.723 atkvæði í 1.-8. sæti.
9. Bolli Thoroddsen með 6.100 atkvæði í 1.-9. sæti.
10. Marta Guðjónsdóttir með 5.327 atkvæði í 1.-9. sæti.
11. Ragnar Sær Ragnarsson með 3.719 atkvæði í 1.-9. sæti.
12. Kristján Guðmundsson með 3.467 atkvæði í 1.-9. sæti.
13. Björn Gíslason með 2.897 atkvæði í 1.-9. sæti.
14. Jóhann Páll Símonarson með 2.091 atkvæði í 1.-9. sæti.
15. Örn Sigurðsson með 1.823 atkvæði í 1.-9. sæti.

Aðrir hlutu færri atkvæði.

• Blogga um frétt