Hæna nokkur í Bretlandi sem breyttist í hana hefur ruglað breska vísindamenn nokkuð í ríminu. Hænan verpti eggjum um allnokkurt skeið en hóf svo undarleg kynskipti, henni óx hanakambur og hún fór að gala. Þar að auki hafa vaxið á hana hanafjaðrir og hálssepi og er haninn, eða hænan, nú farinn að tæla hænur.
Eigandi dýrsins, Jo Richards, segir hænuna nú líta út eins og hana en þó hafi hún ekki „réttu tólin“ til þess að verða fyllilega frambærilegur hani. Kynskiptin eru sögð afar sjaldgæf og til komin vegna aukinnar framleiðslu testósteróns í hænunni. Sky fréttastöðin segir af dýrinu á vef sínum.