Kjartan Gunnarsson hefur ákveðið að láta af störfum sem framkvæmdastjóri Sjálfsstæðisflokksins eftir 26 ára starf í þágu flokksins. Miðstjórn Sjálfstæðisflokksins kom saman til fundar í dag þar sem ákvörðunin var tilkynnt. Á fundi miðstjórnar var ákveðið að ráða Andra Óttarsson, héraðsdómslögmann, í starf framkvæmdastjóra Sjálfstæðisflokksins í stað Kjartans Gunnarssonar og mun hann taka formlega við störfum á næstu vikum.
Andri Óttarsson er 31 árs gamall. Hann lauk embættisprófi í lögfræði frá Háskóla Íslands árið 2001 og öðlaðist málflutningsréttindi fyrir héraðsdómi ári síðar. Andri hefur starfað hjá Lögmönnum við Austurvöll frá útskrift og verið meðeigandi í lögmannsstofunni frá 2004. Hann hefur síðastliðið ár lagt stund á meistaranám í mannréttindum við Raoul Wallenberg stofnunina og Háskólann í Lundi, Svíþjóð.
Andri hefur gegnt margvíslegum trúnaðarstörfum fyrir Sjálfstæðisflokkinn. Hann hefur til að mynda setið í stjórn Heimdallar, í stjórn Sambands ungra sjálfstæðismanna, auk þess sem hann hefur komið að kosningastjórn víða um land. Andri situr í útvarpsráði fyrir hönd Sjálfstæðisflokksins.
Andri var oddviti Vöku, félags lýðræðissinnaðra stúdenta, í stúdentaráði Háskóla Íslands 1998-1999, ásamt því að gegna fjölmörgum trúnaðarstörfum fyrir félagið. Hann var stjórnarformaður Félagsstofnunar stúdenta 2002-2005. Andri hefur verið ritstjóri Deiglunnar, vefrits um þjóðmál, frá 2005.