Whitechapel galleríið í Lundúnum hefur ákveðið að sýna ekki nokkur verk súrrelistans Hans Bellmer á fyrirhugaðri sýningu af ótta við viðbrögð múslíma. Í síðustu viku hætti þýskt óperuhús, Deutsche Oper, við að sýna óperu Mózarts, Idomeno, af sömu ástæðu.
Fyrrnefnd verk Bellmers voru tekin úr sýningu degi fyrir opnun hennar. Einn sýningarstjóra Whitechapel, Agnes de la Beaumelle, segir það hafa verið gert til að ganga ekki fram af íbúum Whitechapel hverfisins, sem eru að stórum hluta múslímar. Í yfirlýsingu frá galleríinu segir að sum verkanna hafi verið fjarlægð vegna ónægs pláss.
Beaumelle segir sýninguna þegar hafa verið setta upp í París og München án nokkurra mótmæla. Bellmer þykir nokkuð vel þekktur á mælikvarða listasögunnar, en í verkum hans má m.a. sjá berar konur í dúkkulíki. Reuters segir frá þessu.