mbl.is/Kristinn

Húsrannsókn byggð á upplýsingum frá einstaklingum og fyrirtækjum

Senda frétt

Prenta frétt

Deila

Deila fréttinni á...

Facebook

Delicious

Hætta við

Twitter

Digg

StumbleUpon

Blogga um frétt

Bloggað um fréttina

2 blogg um fréttina »

• Jónas Björgvin Antonsson
  Skoðum fleira!
• Stefán Friðrik Stefánsson
  Jákvætt skref hjá Samkeppniseftirlitinu

Samkeppniseftirlitið hefur í dag framkvæmt húsleit á skrifstofum tveggja smásöluaðila og þriggja aðila í innflutningi og heildsölu á matvöru. Segir stofnunin, að til grundvallar aðgerðunum liggi upplýsingar sem Samkeppniseftirlitinu hafa borist og aflað hafi verið frá einstaklingum og fyrirtækjum í kjölfar fjölmiðlaumfjöllunar um matvörumarkaðinn nú um daginn.

Í fréttatilkynningu 1. nóvember sl. hvatti Samkeppniseftirlitið þá sem teldu sig hafa upplýsingar um brot á samkeppnislögum til þess að koma þeim upplýsingum á framfæri við eftirlitið og hafa allmargir brugðist við þeirri hvatningu, að því er kemur fram í nýrri tilkynningu, sem stofnunin sendi frá sér nú eftir hádegið.

„Rannsókn sú sem nú er hafin beinist einkum að ætluðum brotum á 10. gr. samkeppnislaga, þ.e. hugsanlegu ólögmætu samráði smásöluaðila og birgja. Kemur rannsóknin til viðbótar við aðrar athuganir sem nú standa yfir og áður hafa verið kynntar opinberlega. Samkeppniseftirlitið mun hraða nýhafinni rannsókn eftir því sem kostur er, en ljóst er að athugunin er viðamikil og að nokkurn tíma mun taka að greina þau gögn sem aflað hefur verið.

Rétt er að vekja athygli á því að þýðingu hefur fyrir skjóta úrlausn málsins hvort fyrirtæki eða einstaklingar ákveða að liðsinna eftirlitinu við rannsókn þess. Ef um brot er að ræða getur Samkeppniseftirlitið samkvæmt lögum fallið frá sektarákvörðun hafi fyrirtæki verið fyrst til að láta því í té upplýsingar eða gögn vegna ólögmæts samráðs sem geta leitt til sönnunar á broti.

Einnig er heimilt að lækka sektir ef fyrirtæki liðsinna eftirlitinu með því að veita mikilvæg sönnunargögn. Þá getur Samkeppniseftirlitið ákveðið að kæra ekki til lögreglu hugsanleg brot einstaklinga sem upplýsa um þau og liðsinna við rannsókn. Fyrirtæki og einstaklingar sem hugsanlega hafa tekið þátt í ólögmætu samráði hafa því skýran hag af því að liðsinna eftirlitinu, en það getur á móti leitt til skjótari málsmeðferðar," segir í tilkynningunni frá Samkeppniseftirlitinu.

Á þessu stigi gefur Samkeppniseftirlitið ekki frekari upplýsingar um rannsóknina.

Til baka