„Það er búið að semja!“

„Það er búið að semja um Icesave við Ísland,“ voru fyrstu viðbrögð talsmanns breska fjármálaráðuneytisins þegar Morgunblaðið innti eftir viðbrögðum vegna væntanlegra fyrirvara Alþingis við Icesave-samninginn. Hann segir bresku ríkisstjórnina skilja samskipti sín við íslensku ríkisstjórnina svo að sú síðarnefnda sé reiðubúin að afla stuðnings þingsins við samkomulagið um Icesave sem var undirritað 5. júní síðastliðinn. Það séu góð tíðindi fyrir bæði löndin að þetta mál verði nú leyst.

Lögfræðingar sem Morgunblaðið ræddi við voru á einu máli. Miðað við almennar reglur samningaréttar jafngilda fyrirvarar við samning höfnun á samningi og nýju tilboði. Þótt ef til vill sé hægt að laga orðalag eða fínstilla tiltekna hluti þá þýða of víðtækir fyrirvarar almennt það að semja þarf upp á nýtt. Fyrirvarar eru þannig vægari eða kurteisari leið til að hafna samningi.

Aðstoðarmaður fjármálaráðherra segir marga þá fyrirvara sem hafa verið í umræðunni ekki rúmast innan þess samnings sem liggur fyrir.

 

Reyna að fá alla að borðinu

„Nú eru allir stjórnmálaflokkar að skoða möguleikana á því að koma sameiginlega að málinu,“ segir Ögmundur Jónasson heilbrigðisráðherra, spurður um málið í gær. „Það þarf að hlusta á sjónarmið allra aðila. Ég held að allir séu komnir á þá skoðun að samningurinn, eins og hann stendur hrár, gangi ekki upp, heldur þurfi að leita eftir samstöðu um skilmála og fyrirvara Alþingis um aðkomu að málinu og þetta eru menn að ræða.“

Samkvæmt heimildum Morgunblaðsins gera þingmenn í Vg sem ekki geta stutt málið óbreytt nú tilraun til þess að ná þverpólitísku samkomulagi um lausn þess með „skýrum og sterkum“ fyrirvörum. Hafa þeir sent skriflegar tillögur til allra flokka með það að markmiði að ná samstöðu á Alþingi um lausn.

Nánar í Morgunblaðinu. Smelltu hér til að gerast áskrifandi.

Til baka