Senda inn efni
Bólusetningar vegna svínaflensunnar hefjast í nóvember Reuters
Bóluefni væntanlegt um mánaðamót
Bóluefni vegna H1N1 inflúensunnar (svínaflensu) er væntanlegt til landsins um næstu mánaðamót. Verður væntanlega byrjað að bólusetja við flensunni í fyrstu viku nóvembermánaðar, að sögn Haraldar Briem, sóttvarnarlæknis. Er þetta talsverð seinkun frá fyrri áætlun eða um þrjár vikur.
Haraldur Briem mbl.is/Heiðar Kristjánsson
Haraldur segir að ekki hafi verið gerðar neinar breytingar á áætlunum um skiptingu landsmanna í markhópa sem kynnt var í síðasta mánuði. Hins vegar sé verið að skoða hvort einhverjir þurfi jafnvel einungis á einni sprautu að halda í stað tveggja líkt og áður var gert ráð fyrir. Engin ákvörðun hefur hins vegar verið tekin þar um.
Að sögn Haraldar hefur inflúensutilvikum sem tilkynnt eru fækkað undanfarnar þrjár vikur og virðist því fyrsta bylgjan vera í rénum. Er það í takt við það sem gert var ráð fyrir. Spurning sé hins vegar hvenær næsta bylgja smita ríði yfir.
Fjórir á sjúkrahús þar af einn á gjörgæslu
Þann 27. september höfðu alls 214 manns greinst með inflúensu A(H1N1)v á Íslandi, sem staðfest var á veirufræðideild Landspítala. Þar af voru 115 karlar og 99 konur. Fjórir einstaklingar hafa verið lagðir inn á sjúkrahús af völdum inflúensu A(H1N1)v 2009 á aldrinum 1 - 43 ára en sá elsti þeirra var lagður á gjörgæsludeild. Þeir hafa allir náð sér eða eru á batavegi. Greinst hafa tilfelli með búsetu á öllum sóttvarnaumdæmum nema í Vestmannaeyjum.
Frá 29. júní – 27. september 2009 hafa borist tilkynningar um samtals 1644 tilfelli með inflúensulík einkenni (ILE) eða staðfesta inflúensu samkvæmt skráningum lækna í rafræna sjúkraskrá. Þar af voru 738 karlar og 906 konur.
Til baka