HM hefur meiri áhrif en eldgosið

„Það er búin að vera ágætistraffík en ekkert meira en það, maður sér að það fjölgar tjöldum næstum því með hverjum deginum,“ segir Arnar Ásgrímsson, landvörður í Landmannalaugum.

„Þetta er allt að fara af stað, júní er yfirleitt rólegur en í júlí fara hóparnir að koma. Við vorum að skoða myndir af tjaldstæðinu frá sama tíma í fyrra og þá var kannski aðeins meira af fólki, en þá var líka mjög fjölmennt,“ segir Arnar.

Eldgosið hefur eflaust einhver áhrif að hans sögn en ekki síður heimsmeistaramótið í knattspyrnu sem heldur mörgum heima við sjónvarpsskjáinn enn sem komið er.

„En það er eiginlega engin aska hérna, maður sér aðeins í fjöllunum í kring en það truflar ekki og það hafa verið að koma hingað hópar sem höfðu ætlað í Þórsmörk en komu hingað í staðinn.“