Þegar einni vertíðinni lýkur tekur sú næsta við. Reimar Vilmundarson og hans menn á Freydísi ÍS fluttu í sumar hátt í tvö þúsund manns frá Norðurfirði norður á Hornstrandir, en þeirri vertíð lauk á sunnudag.
Á þriðjudag lagði Reimar skötuselsnet undir Stigahlíðinni og var búinn að fá tæpt tonn úr tveimur fyrstu trossunum þegar spjallað var við hann undir hádegi í gær, segir í Morgunblaðinu í dag.
„Sumarið kom ágætlega út í ferðamennskunni,“ segir Reimar. „Fyrstu tíu dagana í júlí var reyndar leiðindaveður og nokkuð um að fólk hætti við ferðir. Suma daga var heldur ekkert ferðaveður í kaldagjólu. Síðan lagaðist þetta og á bestu dögunum í sumar annaði ég varla eftirspurn.“