Viðskiptavinir Landsbankans á Hellissandi og Rifi munu þurfa að leita sér þjónustu á Ólafsvík eftir lokun útibúsins á Hellissandi hinn 17. september.
Ekkert bankaútibú verður í bænum eftir lokunina og segist Kristinn Jónasson, bæjarstjóri Snæfellsbæjar, ósáttur við lokunina. „Það er dapurlegt að þegar kemur að niðurskurði er alltaf byrjað úti á landi. Það verður minna vart við hann í þéttbýlinu.“
Útibússtjóri Landsbankans í Snæfellsbæ, Eysteinn Jónsson, segir sameiningu útibúanna á Hellissandi og Ólafsvík munu leiða til betri bankaþjónustu fyrir íbúa svæðisins og aukinna möguleika fyrir starfsfólk bankans. „Það er stutt á milli, þetta eru eins og tvö hverfi í sama sveitarfélagi.“