Björgvin tekur aftur við kynferðisbrotadeild

Lögreglustjóri höfuðborgarsvæðisins hefur óskað eftir því að Björgvin Björgvinsson, aðstoðaryfirlögregluþjónn, endurskoði þá ákvörðun sína að stíga til hliðar sem daglegur stjórnandi kynferðisbrotadeildar lögreglunnar. Hefur Björgvin fallist á það.

Björgvin óskaði eftir því í ágúst að víkja vegna ummæla sem höfð voru eftir honum í DV og vöktu hörð viðbrögð. 

Fram kemur í tilkynningu frá lögreglunni, að Björgvin hafi ásamt samstarfsfólki sínu byggt upp starfsemi kynferðisbrotadeildar LRH frá því að hún var sett á laggirnar 1. janúar 2007 með afar góðum árangri, sem m.a. megi sjá í umfjöllun ríkissaksóknara um meðferð kynferðisbrota í greinargerð til dómsmála- og mannréttindaráðuneytisins frá því í haust.

„Björgvin nýtur og hefur ætíð notið fyllsta trausts yfirstjórnar lögreglu, en hann hefur að undanförnu stýrt með góðum árangri umfangsmikilli og flókinni rannsókn lögreglu á manndrápsmáli í Hafnarfirði, sem nú er lokið. Við þau þáttaskil hafi hann verið beðinn um að endurskoða ákvörðun sína eins og að framan greinir," segir í tilkynningunni.

• 1 blogg um fréttina

Bloggað um fréttina

• Heimir Lárusson Fjeldsted: Auðvitað