Heiðagæsasteggirnir Hörður og Úlfar eru komnir heim eftir vetursetu á Bretlandseyjum. Úlfar kom fyrir viku en Hörður í fyrradag, að sögn dr. Arnórs Þóris Sigfússonar, dýravistfræðings hjá Verkis.
Hörður og Úlfar komust í fréttir í fyrra fyrir það hve tæknivæddir þeir væru. Báðir eru búnir GPS staðsetningartækjum og GSM sendum sem senda smáskilaboð (sms) með upplýsingum um staðsetningu þeirra.
Mikilvægar upplýsingar hafa safnast um hegðun gæsanna frá því að þær voru merktar við Hálslón í fyrrasumar, bæði um farflugið og hegðun á vetrarstöðvunum, að því er fram kemur í umfjöllun um þessa merku steggi tvo í Morgunblaðinu í dag.