Töluverður erill var hjá lögreglunni á höfuðborgarsvæðinu í nótt. Nokkrir ökumenn voru stöðvaðir vegna aksturs undir áhrifum ávana- eða fíkniefna og þá var einnig lagt hald á kannabisplöntur.
Á fimmta tímanum í nótt var tilkynnt um innbrot og þjófnað í verslun í austurborginni. Þjófarnir höfðu á brott með sér nokkrar fartölvur en ekki er enn vitað hver eða hverjir voru þar að verki.
Í Hafnarfirði var kannabisræktun stöðvuð á tíunda tímanum í gærkvöldi og lagt hald á þrjátíu plöntur. Á tólfta tímanum var síðan lagt hald á 100 grömm af kannabis í heimahúsi í bænum.
Þá voru alls fimm ökumenn stöðvaðir í nótt vegna gruns um akstur undir áhrifum ávana- eða fíkniefna. Hjá einum fundust jafnframt ætluð fíkniefni við leit í bílnum.