Eldur kviknaði í íbúðarhúsi á Patreksfirði um hálfníuleytið í kvöld. Á efri hæðinni voru kona og barn sem urðu vör reykskynjara og gátu forðað sér úr húsinu.
Mjög mikill reykur var í húsinu þegar slökkvilið bar að garði og töluverður hiti. Mikill eldur var á fyrstu hæð hússins, sem er mikið skemmt. Slökkvilið Vesturbyggðar hafði náð tökum á eldinum þegar mbl.is náði tali af mönnum á vettvangi.
Slökkvilið Vesturbyggðar leggur áherslu á að mun verr hefði getað farið ef ekki hefði verið reykskynjari í húsinu og hvetur fólk til að huga að reykskynjurum.