Ónæði vegna skammtímaleigu á íbúðum til ferðamanna í miðborg Reykjavíkur er orðið útbreitt vandamál og telur Húseigendafélagið tilefni til þess að rýmka heimildir til gjafsókna. Fjöldi fólks í miðborginni hiki við sækja rétt sinn vegna mikils kostnaðar við lögfræðiþjónustu.
Í umfjöllun um mál þetta í Morgunblaðinu í dag segir Sigurður Helgi Guðjónsson, formaður Húseigendafélagsins, aflsmun á milli stórra leigufélaga, sem hafi jafnvel tugi íbúða í leigu, og íbúa í húsum sem hefur að hluta verið breytt í íbúðahótel á síðustu árum.
„Stór fyrirtæki sem kaupa fjölda íbúða eru öflug fyrir rétti. Þau geta varið sig. Þar eru peningarnir en ekki hjá þeim íbúum sem eru jafnvel orðnir í minnihluta í fjölbýlishúsum. Til að bregðast við þessu væri hægt að rýmka heimild til þess að veita gjafsókn. Þeir sem hafa ekki efni á að sækja rétt sinn geta þá sótt um gjafsókn til innanríkisráðuneytisins. Ríkið greiðir þá kostnaðinn,“ segir Sigurður Helgi.