Reynir Traustason, ritstjóri DV, upplýsir um það á samfélagsvefnum Facebook í dag að tugir áskrifenda hafi sagt upp DV og rekur það til aðkomu Björns Leifssonar að eigendahópi fjölmiðilsins. Aðalfundur DV ehf. fer fram um miðjan dag á morgun en þar verða eigendamálin í brennidepli.
Eins og greint var frá á mbl.is í gær ríkir óvissuástand á fréttastofu DV þessa dagana en miklar deilur hafa verið í stjórn DV undanfarna mánuði sem leiddu til þess að Þorsteinn Guðnason var settur af sem stjórnarformaður fyrirtækisins. Í kjölfarið hófst barátta um fyrirtækið sem stendur enn yfir.
„Ég bið það góða fólk sem er í áskrift að halda ró sinni og ígrunda málið eftir aðalfund á morgun. Enn sem komið er hefur Björn ekki náð fram vilja sínum gagnvart ritstjórninni þótt óneitanlega setji hann svartan blett á hluthafahópinn,“ skrifar Reynir á Facebook.