Evrópsk samgönguvika hófst í dag og af því tilefni opnaði Hjálmar Sveinsson, formaður umhverfis- og skipulagsráðs Reykjavíkur, nýjan hjólastíg við Suðurhlíð.
Markmið samgönguvikunnar er að hvetja fólk til umhugsunar um eigin ferðavenjur og virkja það til að nota almenningssamgöngur, hjóla eða ganga. Boðið verður upp á ýmsa viðburði í borginni til að vekja athygli á vistvænum ferðavenjum í Reykjavík. Samgönguvika er evrópskt átak um bættar samgöngur í borgum og bæjum, að því er segir í tilkynningu frá Reykjavíkurborg.
Ráðstefna um vistvænar samgöngur á vegum Grænu orkunnar verður haldin á Grand Hótel miðvikudaginn 17. september og hefst hún kl. 8:50.
Á fimmtudag kl. 18:00 er boðið upp á hjólaferð um borgina undir leiðsögn Árna Davíðssonar og lýkur ferðinni í súpu á Loft hostel.
Á föstudag verður haldin ráðstefnan Hjólum til framtíðar í Iðnó með fjölbreyttri dagskrá. Í lok ráðstefnunnar afhendir borgarstjóri hjólaskálina sem er viðurkenning fyrir eflingu hjólreiða. Í beinu framhaldi af ráðstefnunni er mótttaka í ráðhúsi Reykjavíkur þar sem borgarstjóri afhendir Samgönguviðurkenningu Reykjavíkurborgar.
Á laugardag hefja Hjólafærni á Íslandi og Landsamtök hjólreiðarmanna á ný vikulegar hjólreiðar um höfuðborgarsvæðið frá Hlemmi. Lagt verður af stað kl. 10 í tveggja tíma ferð.
Mánudaginn 22. september er „Bíllausi dagurinn“ en þá eru borgarbúar hvattir til að skilja bílinn eftir heima, þegar haldið verður til vinnu eða skóla.