Landsnet hefur flutt stálturna og annað viðgerðarefni að tengivirkjum fyrirtækisins við Búrfell og Sultartanga til að auka viðbragðsgetu og stytta viðgerðartíma, komi til bilana á háspennulínum á Þjórsár- og Tungnaársvæðinu vegna eldgoss í Bárðarbungu.

Fjórir vöruflutningabílar með neyðarbúnað til fyrstu viðbragðsaðgerða lögðu af stað frá lager Landsnets á Geithálsi í morgun með stefnu á Búrfell og Sultartanga. Á vögnunum eru stálturnar ásamt fylgibúnaði, tréstaurar og þverslár sem komið verður fyrir við tengivirki Landsnets við Sultartanga til að flýta fyrir viðgerð ef til þess kæmi að 220 kílóvolta (kV) háspennulínur Landsnets á þessu svæði gæfu sig í hamfaraflóði af völdum eldgoss.

Einnig er verið að flytja að tengivirkinu við Búrfell stálsúlur sem notaðar verða til framhjátengingar 220 kV Sultartangalínu 2 yfir í 220 kV Búrfellslínu 3 við tengivirki Landsnets í Búrfelli, ef þess gerist þörf. Undirstöður, stagfestur og stagteinar eru þegar til staðar á svæðinu frá því að tengingin var notuð þegar tengivirkið í Búrfelli var í byggingu.

Þá fóru tveir vöruflutningabílar í gær með tvo gáma með neyðarturnum og allskyns fylgihlutum að tengivirki Landsnets við Sultartanga. Á lagernum á Geithálsi eru einnig tiltækir til flutnings leiðari, einangrarar, stagvír og annað fylgiefni sem þörf gæti orðið fyrir.

Enn fremur voru tveir flutningabílar, fullhlaðnir staurum, sendir austur á Egilsstaði í gær til að hafa þar tiltækar neyðarbirgðir til viðbótar við það viðgerðarefni sem þegar hefur verið flutt til Norðausturlands, þannig að einnig verði hægt að koma austan að með viðgerðarefni komi til flóðs í Jökulsá á Fjöllum vegna goss í Bárðarbungu.

Tengdar fréttir

Bárðarbunga

Gæti verið byrjunin á margra ára ferli

• Stærsti skjálftinn í Bárðarbungu í níu ár
• Kröftugur jarðskjálfti í Bárðarbungu
• Jarðskjálfti í Bárðarbungu
• Sá stærsti síðan í október

» Fleiri tengdar fréttir

• Blogga um frétt