Í dag, laugardaginn 20. september, fór fram Íslandsmeistarakeppni í Ökuleikni á rútum og trukkum. Keppnin var haldin á svæði Ökuskóla 3 við Borgartún í Reykjavík en Brautin – bindindisfélag ökumanna stóð fyrir keppninni.
Til leiks voru skráðir fimmtán keppendur. Sumir höfðu keppt áður en aðrir voru nýir. Eftir að hafa svarað umferðarspurningum byrjuðu keppendur á að aka í gegnum tvö þrautaplön. Á öðru planinu var ekið á stórri rútu en á lítilli rútu á hinu planinu. Rúturnar komu báðar frá SBA Norðurleið. Eftir að hafa ekið í gegn á rútum var skipt yfir á trukk frá Líflandi og sendibíl frá Öskju.
Tíminn var tekinn og fyrir hverja villu sem keppendur gerðu bættust 20 sekúndur við tímann. Þá bættust 5 sekúndur við tímann fyrir hverja villu í spurningum.
Keppendur tóku þátt sem einstaklingar en þeim gafst einnig kostur á að mynda lið. Verðlaun voru veitt fyrri efstu þrjú sætin í einstaklingskeppnum og efsta sæti í liðakeppnum. Eimskip gaf verðlaun fyrir trukkakeppnina og Askja fyrir rútukeppnina.
Á morgun kl. 13 verður svo keppt í Ökuleikni á fólksbílum en þá er það Hekla sem lánar VW UP, VW Polo og VW Golf.
<b>Úrslit</b> <b>Rútur</b>1. Kristján Jóhann Bjarnason 491 sek
2. Atli Grímur Ásmundsson 501 sek
3. Smári Baldursson 505 sek
Efstir í liðakeppni urðu Uppgjafarútubílstjórar en það lið var skipað þeim Sigurði Sigurbjörnssyni og Björgvini Gunnarssyni.
<b>Trukkar</b>1. Björgvin Gunnarsson 322 sek
2. Óskar Kristófer Leifsson 371 sek
3. Ævar Sigmar Hjartarsson 376 sek
Uppgjafarútubílstjórarnir urðu sömuleiðis efstir í liðakeppni á trukkum.